News

03/07/2026

🚨 ਪਰਥ 'ਚ ਪਹਿਲੀ ਵਾਰ ਬਰਡ ਫਲੂ ਦਾ ਖ਼ਤਰਾ! H5 ਵਾਇਰਸ ਮਿਲਣ ਨਾਲ ਪ੍ਰਸ਼ਾਸਨ ਅਲਰਟ, ਪਾਲਤੂ ਜਾਨਵਰਾਂ ਦੇ ਮਾਲਕਾਂ ਲਈ ਵੱਡੀ ਚੇਤਾਵਨੀ

ਆਸਟ੍ਰੇਲੀਆ ਦੇ ਪਰਥ ਸ਼ਹਿਰ ਵਿੱਚ ਪਹਿਲੀ ਵਾਰ H5 ਬਰਡ ਫਲੂ ਦਾ ਸ਼ੱਕੀ ਮਾਮਲਾ ਸਾਹਮਣੇ ਆਉਣ ਨਾਲ ਸਿਹਤ ਅਤੇ ਜੰਗਲੀ ਜੀਵ ਵਿਭਾਗ ਵਿੱਚ ਚਿੰਤਾ ਵੱਧ ਗਈ ਹੈ। ਉੱਤਰੀ ਪਰਥ ਦੇ ਮੁਲਾਲੂ (Mullaloo) ਅਤੇ ਵਿਟਫੋਰਡਸ (Whitfords) ਬੀਚ ਦੇ ਦਰਮਿਆਨ ਇੱਕ ਮ੍ਰਿਤਕ ਸਮੁੰਦਰੀ ਪੰਛੀ ਜਾਇੰਟ ਪੈਟਰਲ (Giant Petrel) ਮਿਲਿਆ, ਜਿਸ ਦੀ ਮੁੱਢਲੀ ਜਾਂਚ ਵਿੱਚ H5 ਬਰਡ ਫਲੂ ਦੇ ਸੰਕੇਤ ਮਿਲੇ ਹਨ। ਹੁਣ ਇਸ ਪੰਛੀ ਦੇ ਨਮੂਨੇ ਅੰਤਿਮ ਪੁਸ਼ਟੀ ਲਈ CSIRO ਦੀ ਲੈਬ, ਜੀਲੋਂਗ ਭੇਜੇ ਗਏ ਹਨ। ਅਧਿਕਾਰੀਆਂ ਨੂੰ ਉਮੀਦ ਹੈ ਕਿ ਅੰਤਿਮ ਰਿਪੋਰਟ ਇਸ ਹਫ਼ਤੇ ਦੇ ਅੰਤ ਤੱਕ ਆ ਜਾਵੇਗੀ।

ਇਸ ਘਟਨਾ ਤੋਂ ਬਾਅਦ ਪਰਥ ਦੇ ਸਮੁੰਦਰੀ ਤੱਟਾਂ ‘ਤੇ ਨਿਗਰਾਨੀ ਵਧਾ ਦਿੱਤੀ ਗਈ ਹੈ। ਮੱਛੀ ਪਾਲਣ ਵਿਭਾਗ ਦੇ ਅਧਿਕਾਰੀਆਂ ਨੂੰ ਬੀਚਾਂ ‘ਤੇ ਗਸ਼ਤ ਕਰਨ ਅਤੇ ਕਿਸੇ ਵੀ ਬਿਮਾਰ ਜਾਂ ਮਰੇ ਹੋਏ ਪੰਛੀ ਦੀ ਤੁਰੰਤ ਜਾਣਕਾਰੀ ਇਕੱਠੀ ਕਰਨ ਦੇ ਹੁਕਮ ਦਿੱਤੇ ਗਏ ਹਨ।ਸਰਕਾਰ ਨੇ ਖ਼ਾਸ ਕਰਕੇ ਪਾਲਤੂ ਕੁੱਤਿਆਂ ਅਤੇ ਬਿੱਲੀਆਂ ਦੇ ਮਾਲਕਾਂ ਨੂੰ ਸਾਵਧਾਨ ਰਹਿਣ ਦੀ ਅਪੀਲ ਕੀਤੀ ਹੈ। ਲੋਕਾਂ ਨੂੰ ਕਿਹਾ ਗਿਆ ਹੈ ਕਿ ਆਪਣੇ ਕੁੱਤਿਆਂ ਨੂੰ ਬੀਚਾਂ ਅਤੇ ਜੰਗਲੀ ਪੰਛੀਆਂ ਤੋਂ ਦੂਰ ਰੱਖਣ, ਉਨ੍ਹਾਂ ਨੂੰ ਲੀਸ਼ ‘ਤੇ ਹੀ ਘੁਮਾਉਣ ਅਤੇ ਬਿੱਲੀਆਂ ਨੂੰ ਖੁੱਲ੍ਹਾ ਨਾ ਛੱਡਣ।

ਖੇਤੀਬਾੜੀ ਅਤੇ ਖੁਰਾਕ ਮੰਤਰੀ ਜੈਕੀ ਜਾਰਵਿਸ ਨੇ ਕਿਹਾ ਕਿ ਹੁਣ ਤੱਕ ਇਹ ਵਾਇਰਸ ਸਿਰਫ਼ ਪਰਵਾਸੀ ਸਮੁੰਦਰੀ ਪੰਛੀਆਂ ਵਿੱਚ ਹੀ ਮਿਲਿਆ ਹੈ। ਇਸ ਦੇ ਸਥਾਨਕ ਪੰਛੀਆਂ ਜਾਂ ਪੋਲਟਰੀ ਫਾਰਮਾਂ ਵਿੱਚ ਫੈਲਣ ਦੇ ਕੋਈ ਸਬੂਤ ਨਹੀਂ ਮਿਲੇ ਅਤੇ ਨਾ ਹੀ ਵੱਡੇ ਪੱਧਰ ‘ਤੇ ਪੰਛੀਆਂ ਦੀ ਮੌਤ ਦੀ ਕੋਈ ਘਟਨਾ ਸਾਹਮਣੇ ਆਈ ਹੈ। ਇਸ ਦੌਰਾਨ ਪਰਥ ਜੂ ਨੇ ਵੀ ਬਾਇਓਸਿਕਿਊਰਿਟੀ ਪ੍ਰਬੰਧ ਹੋਰ ਸਖ਼ਤ ਕਰ ਦਿੱਤੇ ਹਨ। ਚੁਣੀਆਂ ਹੋਈਆਂ ਪੰਛੀ ਵਾਲੀਆਂ ਥਾਵਾਂ ਦੇ ਬਾਹਰ ਸੈਨਿਟਾਈਜ਼ੇਸ਼ਨ ਮੈਟ ਲਗਾਏ ਜਾ ਰਹੇ ਹਨ ਤਾਂ ਜੋ ਵਾਇਰਸ ਦੇ ਸੰਭਾਵਿਤ ਫੈਲਾਅ ਨੂੰ ਰੋਕਿਆ ਜਾ ਸਕੇ।

ਗੌਰਤਲਬ ਹੈ ਕਿ 19 ਜੂਨ ਤੋਂ ਬਾਅਦ ਵੈਸਟਰਨ ਆਸਟ੍ਰੇਲੀਆ ਵਿੱਚ ਐਮਰਜੈਂਸੀ ਐਨੀਮਲ ਡਿਜ਼ੀਜ਼ ਹਾਟਲਾਈਨ ‘ਤੇ ਲਗਭਗ 800 ਸ਼ਿਕਾਇਤਾਂ ਦਰਜ ਹੋ ਚੁੱਕੀਆਂ ਹਨ, ਜਿਨ੍ਹਾਂ ਵਿੱਚੋਂ 118 ਮਾਮਲਿਆਂ ਦੀ ਵਿਸ਼ੇਸ਼ ਜਾਂਚ ਕੀਤੀ ਗਈ ਅਤੇ 58 ਦੀ ਰਿਪੋਰਟ ਨੈਗੇਟਿਵ ਆਈ ਹੈ।ਜੇ ਪਰਥ ਦਾ ਇਹ ਮਾਮਲਾ ਪੁਸ਼ਟ ਹੋ ਜਾਂਦਾ ਹੈ ਤਾਂ ਇਹ ਵੈਸਟਰਨ ਆਸਟ੍ਰੇਲੀਆ ਦਾ ਪੰਜਵਾਂ ਅਤੇ ਆਸਟ੍ਰੇਲੀਆ ਦਾ ਛੇਵਾਂ ਪੁਸ਼ਟ ਮਾਮਲਾ ਹੋਵੇਗਾ। ਇਸੇ ਦੌਰਾਨ ਨਿਊ ਸਾਊਥ ਵੇਲਜ਼ ਵਿੱਚ ਵੀ H5 ਬਰਡ ਫਲੂ ਦਾ ਪਹਿਲਾ ਸ਼ੱਕੀ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ਕਾਰਨ ਦੇਸ਼ ਭਰ ਵਿੱਚ ਨਿਗਰਾਨੀ ਹੋਰ ਵਧਾ ਦਿੱਤੀ ਗਈ ਹੈ। ਫਿਲਹਾਲ ਅਧਿਕਾਰੀਆਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਨੂੰ ਬੀਚ ਜਾਂ ਹੋਰ ਥਾਵਾਂ ‘ਤੇ ਕੋਈ ਬਿਮਾਰ ਜਾਂ ਮ੍ਰਿਤਕ ਪੰਛੀ ਦਿਖਾਈ ਦੇਵੇ ਤਾਂ ਉਸ ਨੂੰ ਹੱਥ ਨਾ ਲਗਾਇਆ ਜਾਵੇ ਅਤੇ ਤੁਰੰਤ ਸੰਬੰਧਿਤ ਵਿਭਾਗ ਨੂੰ ਸੂਚਿਤ ਕੀਤਾ ਜਾਵੇ।